آزادی

Post info

• Posted on August 14, 2006 at 9:30 am
• Filed in Fiction, Pakistan, Urdu
• Tagged with None
• Help Difficulty in reading Urdu?
• (Possibly) similar posts
  • An Old Man’s Birthday
  • The Month, again
  • The Month
  • اضطراب
  • بِلا عنوان
• Previous This Morning
• Next The Light Bulb That Never Showed Up

“ابو! یہ آزادی کیا ہوتی ہے؟”

“بیٹے، اس سوال کا جواب تو خود مجھے آج تک نہیں مل سکا۔”

“پھر بھی، بتائیں نا۔”

“آزادی کہتے ہیں رہائی کو، یا خود مختاری کو۔”

“رہائی؟”

“ہاں، رہائی۔ جیسے کسی پرندے کو پنجرے سے رہائی ملتی ہے۔”

“اچھا؟ تو یہ جو جشنِ آزادی ہے، یہ ہم پرندے کی رہائی کا جشن مناتے ہیں؟”

“ارے نہیں۔”

“تو پھر؟”

“اصل میں اگست کی ۱۴ تاریخ کو ہم سب رِہا ہوئے تھے۔”

“ہم سب؟ یعنی میں اور آپ؟ اور امی اور دادا اور خالہ اور چاچو اور رضی بھائی، سارے کے سارے؟”

“نہیں بھئی۔ ہم سب کا مطلب ہماری قوم۔”

“قوم؟”

“ہاں۔ پاکستان میں رہنے والے سارے ایک قوم ہیں۔”

“ہوں! تو امریکا میں رہنے والے دوسری قوم ہوتے ہوں گے؟”

“ہاں بیٹا، ہر ملک میں رہنے والے علیحدہ قوم کہلاتے ہیں۔”

“لیکن ابو! اُس دن امام صاحب تو کہہ رہے تھے کہ سارے مسلمان ایک قوم ہیں۔”

“ہاں، یہی کہا تھا انہوں نے۔”

“تو پھر سعودی عرب والے ہم سے علیحدہ قوم ہیں یا ایک ہی ہیں؟”

“آں۔۔۔”

“دیکھیں نا، وہ بھی مسلمان ہیں اور ہم بھی۔”

“بیٹے، یہ بات ابھی آپ کی سمجھ میں نہیں آئے گی۔”

“اچھا؟ چلیں چھوڑیں۔ یہ بتائیں کہ ہم نے رہائی کس سے حاصل کی تھی؟”

“انگریزوں سے۔”

“انگریز کوئی علیحدہ قوم ہیں؟”

“ہاں بیٹا۔ برطانیہ کے لوگ انگریز کہلاتے ہیں۔”

“ہوں! تو انگریزوں نے ہماری قوم کو پنجرے میں بند کیا ہوا تھا؟”

“نہیں بیٹے۔ اصل میں انگریزوں کی اِس خِطّے میں حکومت تھی۔۔۔”

“کونسا خِطّہ؟”

“برِّ صغیر۔ آج کل جہاں پاکستان، بھارت اور بنگلہ دیش ہیں۔”

“اچھا!”

“ہاں۔ ہوا کچھ یوں تھا کہ یہاں پر مسلمان اور ہندو رہتے تھے، اُن کے اوپر انگریز حکومت کرتے تھے۔ پہلے تمام مسلمانوں اور ہندوؤں نے مل کر انگریزوں کی حکومت ختم کرنے کی کوشش کی، لیکن پھر کچھ مسلمانوں نے محسوس کیا کہ اس طرح ہندوؤں کی حکومت ہو جائے گی کیونکہ وہ تعداد میں زیادہ تھے۔ اِس لیے انہوں نے سوچا کہ ہم ایک علیحدہ ملک بنا لیتے ہیں جہاں آرام سے رہیں گے۔”

“ہوں! اور پھر مسلمانوں نے پاکستان بنا لیا؟”

“ہاں۔ لیکن اتنی آسانی سے نہیں بنایا۔ بڑی قربانیاں دینی پڑیں۔”

“وہ کیوں؟”

“کیونکہ انگریز اور ہندو مسلمانوں کو ان کا علیحدہ ملک دینے پر تیار نہیں تھے۔ اس لیے مسلمانوں کو جدوجہد کرنی پڑی۔”

“اچھا۔”

“جی بیٹا۔”

“آپ نے ایک دوسرا مطلب بھی تو بتایا تھا آزادی کا۔”

“خود مختاری؟”

“ہاں، یہی۔ یہ کیا ہوتی ہے؟”

“بیٹے، خود مختاری کا مطلب ہوتا ہے اختیار میں ہونا۔”

“اب یہ اختیار کیا ہوتا ہے؟”

“اس سے مراد یہ ہے کہ اپنے تمام کام اور فیصلے اپنے مرضی سے کر سکنا۔”

“اچھا؟”

“ہاں۔ مسلمانوں کو علیحدہ ملک اس لیے بھی چاہیے تھا تاکہ وہ سکون سے اپنے دین کے مطابق زندگی بسر کر سکیں۔ یہ اُسی وقت ممکن تھا جب وہ خود مختار ہوتے۔”

“اچھا! یعنی آزادی کا مطلب یہ ہوا کہ ہماری قوم کسی دوسری قوم کی حکومت میں نہ ہو اور اپنے کام اپنی مرضی سے کر سکے۔”

“جی بیٹا۔”

“اور اپنے فیصلے بھی خود کر سکے، ہے نا؟”

“بالکل بیٹا، آزادی کا یہی مطلب ہے۔”

“لیکن دادا تو کل فون پر کہہ رہے تھے کہ پاکستان نے سارے فیصلے اب امریکا میں ہوتے ہیں۔”

“آں۔۔۔ ہاں۔۔۔ وہ بھی صحیح کہہ رہے تھے۔”

“تو پھر یہ کس قسم کی آزادی ہوئی؟”

“بیٹے، اِسے نام کی آزادی کہتے ہیں۔”

“ہوں! ویسے جب آپ چھوٹے تھے تو تب بھی جشن مناتے تھے؟”

“ہاں بیٹا۔ ہم اُس وقت بھی جشن منایا کرتے تھے۔”

“آپ کیا کِیا کرتے تھے؟”

“گھر پر جھنڈا لگاتا تھا۔ اور چھوٹی چھوٹی جھنڈیوں سے پورا صحن سجاتا تھا۔ آپ کی دادی چراغاں بھی کرتی تھیں۔”

“چراغاں کیا ہوتا ہے؟”

“چھوٹے چھوٹے چراغ جمع کر کے جلانا۔”

“اِس سے کیا فائدہ ہوتا ہے؟”

“بیٹے، اِس سے روشنی ہوتی ہے۔ اور روشنی ہمیشہ امید دلاتی ہے کہ کوشش کرتے رہو تو اچھے دن دور نہیں۔”

“ہوں! لیکن آپ پٹاخے نہیں چلاتے تھے؟”

“ارے نہیں بھئی۔”

“وہ کیوں؟”

“خواہ مخواہ کا شور ہی ہوتا ہے نا۔ اور آگ کا خطرہ الگ۔”

“لیکن رضی بھائی تو اپنے دوستوں کے ساتھ مل کر پلان بنا رہے تھے کہ وہ سب پٹاخے خریدیں گے اور شہر کی روشنیاں دیکھنے چلیں گے۔”

“رضی بھائی یہ کہہ رہے تھے؟”

“ہاں۔ وہ کہہ رہے تھے کہ ویسے ہی ٹریفک کا اتنا ہجوم ہوتا ہے تو ہم سب موٹر سائیکلوں پر بیٹھ کر بیچ میں سے نکل جائیں گے اور اِدھر اُدھر پٹاخے چھوڑیں گے۔ کتنا مزہ آئے گا اُنہیں!”

“بیٹے، اُنہیں تو مزہ آئے گا، لیکن جن کے اوپر پٹاخے گریں گے، وہ تو برا مانیں گے نا۔”

“ہاں، یہ بات بھی ہے۔”

“بالکل۔ دوسروں کو تکلیف دینا بری بات ہے، اور وہ بھی آزادی کے موقع پر۔”

“تو پھر ہمیں کیا کرنا چاہیے؟”

“بھئی اگر شوق ہے تو شہر کی روشنیاں ضرور دیکھنی چاہئیں، مگر دوسروں کو تنگ کیے بغیر۔”

“ہوں!”

“اور ساتھ ہی اپنا جائزہ بھی لینا چاہیے کہ ہم اپنی آزادی کی حفاظت کر رہے ہیں یا نہیں۔”

“وہ کیوں؟”

“وہ اِس لیے کہ آزادی کو برقرار رکھنا اُسے حاصل کرنے سے زیادہ مشکل کام ہے۔”

“تو پھر ہمیں کیا کرنا چاہیے؟”

“آپس میں مِل جُل کر رہنا چاہیے۔”

“اِس سے کیا ہو گا؟”

“ہمارے درمیان محبت بڑھے گی۔ اور اگر خدا نخواستہ کوئی ہمیں تباہ کرنے آئے گا تو ہم سب مِل کر اُس کے خلاف کھڑے ہوں گے۔”

“سمجھ گیا!”

“شاباش!”

“ویسے ابو! میں نے اپنی سائیکل پر جھنڈا لگانا ہے۔ کتنا مزہ آئے گا جب میں سائیکل چلاؤں گا اور جھنڈا لہرائے گا۔”

“آئے گا تو سہی۔”

“آپ لگا دیں نا سائیکل پر جھنڈا۔”

“چلو پھر۔”

“چلیں!”

Leave a comment

Help

• You can also trackback from your own website.
• Your name and email address are required. (Don't worry, your email address will not be shared or published.)
• You can use <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong> in your comment.
• For writing Urdu: Wrap an Urdu paragraph between [p:ur] and [/p]. To write an English word/sentence within an Urdu paragraph, wrap it between [w:en] and [/w]. To write an Urdu word/sentence within an English paragraph (or to write your name in Urdu in the ‘Name’ field), wrap it between [w:ur] and [/w]. More details and examples are here.